ni'o py cadzu co lidne sy fa'a lo melbi mudri vorme .i py kargau le vorme .i sy viska lo kumfa poi culno ru'e loi so'i sai cukta .i so'o cukta cu tcetce tolcitno .i ku'i cnici lo ka zvati .i lo kajna be lo cukta cu se tcita ge so'i da lo srana be so'o cukta cnici ciste gi ji'a lo cukta ke se srana klesi .i sy viska lo kumfa pagbu poi srana lo nu jitro la fekcrida gi'e pilno lo makfa gi'e kurji lo xumjimcelxa'i .i ba zi ku lo ninmu cu klama ti lo trixe be lo kajna gi'e cusku lu fi'i sai susan mi'e dalton mi kurji lo diklo cukta .i xu do ze'a vitke .i xu do djica lo tcati li'u .i pu lo nu sy ka'e spuda kei py cusku lu na go'i .i mi'a nitcu lo nu vitke ro dinju pagbu .i do'a ma cinri li'u .i la dalton mutce cisma gi'e cusku lu .ui sai ji'i pa xadba be lo cukta cu se vreji fo lo skami .i ji'a ti .e la .aleksandrias. cu ponse lo nurfu'i be ro datni li'u ju'e lu .ui sai ko ca'o xamgu gunka .i se ga'a le flira be sy lo nu sy ba za'u roi vitke cu nalspaji mi li'u .i sy .e py tolrinsa cusku gi'e cliva

ni'o py jarco fi sy fe lo vorme be lo barda ke ckana kumfa .i ku'i na nergau .i ki'u bo lo nu so'e kalte ca sipna .i py ciksi fo lo du'u so'i kalte cu zmanei lo nu xabju ti mu'i lo nu na nitcu co ciksi lo cizra se gasnu je fasnu .i za'u re'u ku py jarco fi sy fe lo dabytadji kumfa .i ku'i vasru fu'e po'o lo matci .e lo xance xarci .i py ciksi fo lo du'u lo kalte so'a roi pilno lo xarci mu'i lo nu so'a fekycrida cu mutce tsali .i ri'a la'e di'u lo nu damba se pi'o lo xadni po'o cu mutce ckape

ni'o py cusku lu .i lo ro moi cinri kumfa cu xumjimcelxa'i rapcreze'a kumfa li'u .i lo ninmu poi frili bevri lo rajyserti gi'e dasni lo tutci ke betfu skori cu cusku lu zo'o ko troci lo nu ci roi sutra cusku le pu selbri li'u .i py cusku lu coi .rut.an. ti no'u la .susan. cu cnino ke cmima troci li'u ju'e lu coi .susan. ko fraxu mi lo nu na stali gi'e tavla .i ku'i mi bilga lo nu cikre lo spofu te gusni .i ji'a la .stefen. di'i je ca se nabmi fi lo skami .i co'o re do li'u .i ca lo nu tavla vau la .rut.an. na jdika lo nilsutra .i py milxe cmila gi'e cusku lu .io ta mutce kurji le jibri li'u gi'e di'a cadzu

ni'o le xumjimcelxa'i rapcreze'a kumfa cu vasru pa remna noi ninmu gi'e ca ca'a rapcreze'a pa xumjimcelxa'i .i ri barda gi'e cladu .i ji'a le ninmu cu mutce certu .i ba za bo le ninmu cu sisti lo nu rapcreze'a kei gi'e rinsa sy .e py se cu'u lu coi pal coi susan mi'e .reitcel. mi xenru lo jvinu be mi .i ku'i mi pu zi cikna binxo .i mi kurji tu'a lo xumjimcelxa'i ne'i ti .i ti'e do djica lo nu binxo lo kalte .i lo nu da'i go'i cu ba se sarcu lo nu do so'i sai roi pilno le bu'u kumfa li'u .i sy milxe cisma gi'e cusku lu mi ca'a djica .i mi cinmo kakne lo nu tadni lo xumjimcelxa'i .i ku'i .u'u mi na pu pilno li'u ju'e lu na vajni .i la'a mi ba nelci lo nu ctuca do .i ku'i ca ku .e'u ma'a xruti le sanmi kumfa .i lo drata kalte ba zi cikna binxo li'u