ni'o sy cusku fi vy no'u la .deivid. fe lu .oi do pu kakne lo nu jdegau mi tu'a le janco .i mi ba ze'u se xrani fo lo ka skapi ciblu li'u ju'e lu pau nai da'i lo nu mi jdegau fi do cu mukti lo nu do gasnu ma poi frica .i da'i do to'e surla binxo .i do ba rapcreze'a ze'u lo jeftu be li so'o ba'o lo nu do ji'a surla pa'a le pu zi pa moi krefu .i ku'i lo nu do pa roi surla pilno lo xumjimcelxa'i cu rinka lo nu do jimpe le te zukte li'u ju'e lu .oi .e'e nai mi jimpe .i ku'i lo nu do dunda lo kerlo bandu ba'e pu le pa moi rapli cu da'i te xendo li'u .i dy dunda lo jipci .i sy xagji citka gi'e ckire cusku .i vy cuksu lu xu do zmanei lo nu pa re'u lifri lo xumjimcelxa'i cladu ca lo nu damba li'u .i sy de'a lo nu moklu maxra gi'e catlu vy gi'e na'e gleki cusku lu la'a na go'i li'u

ni'o ba bo sy mo'u citka .i vy cusku lu xu do tatpi li'u ju'e lu na mutce go'i li'u ju'e lu .i'a xu do djica lo nu co'a cilre lo dabytadji .i .e'u nai la'a ba xrani do fo lo ji'a skapi ciblu li'u ju'e lu .ue cai zo'o do mi kurji gi'e kajde .i zo'o nai mi ca ponse pa barda ke skapi ciblu .i lo cnino cu na mutce vajni .i go'a li'u

ni'o le dabytadji kumfa cu vasru la .axmed. po'o .i ri rapcreze'a lo dabytadji fo tu'a lo mutce barda ke kruvi cladakxa'i .i sy cusku lu .io sai xu la .axmed. pilno lo simsa cladakxa'i lo nu kalte li'u .i vy cusku lu go'i .i .a bu bevri ra re'o lo trixe .i ti'e .a bu boi pa roi katna lo bongu remsmimi'i re xadba li'u .i .a bu cusku lu re roi .i .u'i mutce barda cladakxa'i li'u .i sy cusku lu .y. lo bongu remsmimi'i cu mo li'u .i vy cusku lu minji gi'e jvinu simsa lo remna gi'e ku'i marji lo bongu po'o .i ra clani lo re si'e lo ni lo remna cu clani li'u

ni'o vy cusku lu .i ku'i do ca na pilno lo xarci .i ko cilre fi lo nu farlu .i ro lo ny cy remna cu farlu cilre .i ji'a ro ra xebni lo nu go'i .i ku'i sarcu .i lo nu certu lo ka farlu cu mutce se nelci li'u ju'e lu .y. mi ca djuno fi lo nu farlu li'u .i vy na'e se zdile cisma gi'e cusku lu roda simsa cusku .i to'i cladu zmadu toi doi .axmed. xu do bredi li'u .i .a bu cusku lu go'i li'u

ni'o sy se spaji lo nu vy klama gi'e se gunta vau .a bu .i sy birti lo du'u .a bu curve troci lo nu darxi vy le cladakxa'i .i ji'a sy birti lo du'u da'i lo nu .a bu snada cu rinka lo nu vy mutce jursa se xrani .i ku'i .a bu na snada .i vy boi ro roi lo nu .a bu muvgau le cladakxa'i cu sezmuvgau to'o ri .i so'i roi ku vy korcu sfubu ja gunro le loldi ni'a le cladakxa'i .i so'i roi ku vy plipe sfubu ga'u le cladakxa'i .i ro roi ku lo pa moi te pencu be le loldi bei vy cu na'e jamfu .i se ki'u bo sy tugni fi lo du'u vy boi ro roi farlu .i ku'i na simsa lo nu farlu poi sy pu zgana gi'a lifri .i .io sai sy te simlu lo ka vy boi ro roi pencu le loldi lo drata xadni pagbu .i sy peisku lu .ua mi pu na djuno lo du'u lo remna cu kakne lo nu farlu fi'o se cpana lo stedu gi'e rivbi lo nu se xrani binxo li'u

ni'o vy ca lo nu vy ba'o rivbi le cladakxa'i cu co'a ctuca sy fo lo nu farlu .i ku'i sy pu'o certu .i se ri'a bo so'i roi milxe se xrani binxo .i ku'i sy krici lo nu cilre so'i da .i sy jo'u vy ba lo nu farlu rapcreze'a cu za'u re'u citka .i sy citka lo cmalu po'o .i ku'i vy citka lo ba'u mulno xarju .i sy ba lo nu cikta cu klama le zdani gi'e sipna