ni'o le jmive noi nenri sy cu cuksu lu .oi sai le rokci cu pu zi darxi do pi ro pa xance le do betfu .i do ca tcetce se xrani fo lo nu so'o rango cu spofu gi'e cupra lo ciblu li'u .i sy cusku lu xu mi ba mrobi'o li'u ju'e lu na go'i .i ku'i ju'o do ba dukse cortu .i mi kakne co gasnu lo nu do ze'a na cortu .i ku'i ro nu muvdu cu zenba lo ba nu cortu li'u ju'e lu .y. ma mukti lo nu mi djica la'e di'u li'u ju'e lu lo nu do rivbi le rokci li'u ju'e lu .ua je'e .i xu do kakne co jarco lo ni mi ca cortu li'u

ni'o le jmive na cusku .i ku'i sy lifri lo simsa be di'e .i tu'e pa dakfu cu pagre re pina rango be sy .i ku'i lo dakfu cu mutce glare gi'e cilmo lo slami .i ji'a lo glare je kinli cilta cu sruri jdari lo canti be sy gi'e zenba lo ka trati tu'u .i sy ca lo nu co'a cortu cu zi co'a klaku gi'e menli cusku lu mi na kakne lo nu rivbi vau co lo nu simsa cortu li pe'u jmive ko sisti gasnu li'u .i le nu cortu cu se sisti .i le jmive cu cusku lu lo ni cortu ba lo nu do rivbi cu mutce zenba lo ka duknu rinka .i ku'i .u'u .uu la'a no drata te cuxna li'u ju'e lu .ie .i ko fanta lo nu mi rinka lo mosri rinka ve xrani li'u ju'e lu vi'o .susan. li'u ju'e lu .ii mi bredi li'u .i ba zi bo lo temci flecu cu ranji .i se ri'a bo sy farlu

ni'o sy janli lo kamju .i ku'i sy kurji vo'a se pi'o le xance gi'e plipe lo darno be le rokci le kamju .i sy peisku lu li'a cy nitcu lo nu celgunta le rokci .i se ki'u bo lo nu mi jbini cy le rokci cu sidju lo nu cy kakne co celgunta lo pagbu poi cy djica li'u .i ku'i ba zi bo vy plipe lo crane be sy gi'e cusku lu do tcetce se xrani .i ko cliva li'u gi'e plipe le stedu be le rokci .i sy tinbe gi'e klama lo trixe be cy

ni'o ky .e sy ze'a catlu lo nu cy .e vy troci co catra le rokci .i le rokci .e le vo kalte .e nai lo drata poi jmive cu nenri le kumfa .i za'a vy ba lo nu minde sy cu jgari le stedu be le rokci .i ri mutce tolmencre .i ku'i ri ji'a mutce sutra .i ri so'i roi troci lo nu xairgau vy .i ku'i vy ro roi rivbi .i ji'a cy di'i troci lo nu celgunta le cutne be le rokci lo nu daspo le rinsa fi'o ciksi ky kei le brabra .i sy pu na djuno lo du'u lo simsa vlipa ke xance xumjimcelxa'i cu zasti .i sy zgana lo nu cy jai gau porpi lo rocki poi barda simsa lo jgari xance .i ji'a sy zgana lo nu cy jai gai daspo so'o tabykrili

ni'o ba za bo pa ve xumjimcelxa'i cu pagre fi le risna be le rokci .i sy krici lo du'u lo litce be li za'u mu flecu lo ciblu fo le risna .i le rokci cu cmoni gi'e farlu .i vy plipe lo loldi .i cy cusku lo doi .susan. ko vreta binxo to'i sy ze'i denpa toi ba'e ca ku li'u .i sy tinbe .i le jmive cu menli cusku lu mi xenru li'u

ni'o sy pu lo nu kakne lo nu krixa cu binxo lo ka tolsanji ri'a lo ni cortu