ni'o mu pi re mo'o nu nergau

.i ba za bo le karxe cu tolcliva lo brabra zdani .i sy zgana le nu vy zenba lo ka fengu simlu kei ca'o le nu klama .i sy te preti la'e di'u fo vy .i vy badri se sance gi'e cusku lu mi na birti ri'a lo nu mi pa ji'i pa roi klama .i ku'i pe'i ti zdani le mi bruna li'u .i se mu'i bo ro kalte cu denpa .i ba zi bo sy cusku lu mi pacna lo du'u do na drani li'u .i vy cusku lu mi ji'a pacna li'u

ni'o le girzu cu tolcliva le vorme gi'e denpa .i sy cusku lu ta'o .oi sai mi na kane lo nu te vecnu lo jibni zdani ri'a lo nu dukse lo ka kargu .i ta'i ma ro bradi be mi'o cu ponse lo brabra zdani .i ta'o nai .y. mi'o ca gasnu ma .i xu pilno le janbe li'u .i ky cusku lu na go'i li'u gi'e tcica le stela gi'e kargau le vorme .i .a bu cladu cusku lu .oi cai mi xebni li'u gi'e vamtu .i sy mulno jimpe lo krinu be la'e di'u .i ku'i sy rivbi lo nu vamtu .i ky cusku lu da'i lo nu mi'o na viska lo simsa cu mukti lo nu ga'orgau le vorme gi'e pilno le janbe .i ku'i li'a sai no remna cu bu'u xabju li'u

ni'o le nenri be le zdani cu curve lo ka fenki .i ti rinka lo nu sy morji lo pixra be fi la .ecer. .i le nenri kumfa cu cmalu gi'e vasru vo serti .e no vorme .i ro serti cu se fanmo gi'e se krasi vau pa bargu .i ku'i .ii sai no serti cu kuspe le loldi bi'o lo gapru .i pa serti cu pencu le loldi gi'e ku'i krasi le drudi .i le ci drata serti cu krasi jo nai fanmo lo mlana bitmu gi'e nai pinta ja sraji .i sy cusku lu mi'o na kakne lo nu pilno le serti .i ta'i ma mi'o litru ne'i le zdani li'u .i vy cusku lu do na drani li'u gi'e se jvinu lo ka mutce xanka kei gi'e cusku lu mi xebni li'u gi'e cadzu lo bitmu

ni'o sy ze'i na kakne lo nu tavla .i .a bu cusku lu xu do jimpe lo nu mi xebni lo simsa dinju li'u .i ry cusku lu ro mi'o xebni .i ku'i lo nu cadzu ne'i ti cu sarcu lo nu daspo le cukta to'i cmalu denpa toi za'u re'u ku li'u .i sy cusku lu ma tadji li'u gi'e sligau pa xance fa'a la .deivid. .i ky cusku lu la .deivid. cadzu po'o .i so'i bitmu cu cupra lo drata terjunta .i lo ralju fekcrida cu gansu la'e di'u mu'i lo nu nelci lo za'u ci cimde .i ku'i le ti munje cu se cimde lo ci mei po'o .i se ki'u bo lo ralju fekcrida cu zbasu lo cizra farna je platu .i la'e di'u rinka lo nu simlu lo se xabju munje li'u

ni'o sy ze'i cinri je se terpa catlu vy .i fi'o dicra bo vy fanza cusku lu xu do'o ze'u sanli pau nai .i ko se gidva be mi cadzu li'u .i sy punji le jamfu le serti .i na cinri .i sy ca'u mo'i muvdu gi'e ganse lo nu farlu gi'e vofli ca pa mokca .i se ki'u bo sy xruti .i vy cusku lu ko sutra cadzu .i jo nai do ba farlu li'u .i sy barda vasxu gi'e sutra cadzu le serti .i sy cabyku'e ganse lo nu farlu .e lo nu vofli .i la'e di'u mutce to'e se nelci sy .i ku'i sy na farlu .i ba bo sy sanli le serti gi'e zgana lo du'u le drata kalte to claxu vy toi cu sanli lo sraji salpo be li so no bei sy

ni'o vy cadzu fa'a pa dargu .i le drata kalte cu se gidva to ku'i .a bu smaji claxu toi .i ro le kalte cu pagre le bargu lo cnino kumfa .i le kumfa cu vasru lo flecu be lo xunre litki bei lo kunti canlu bei lo kunti canlu .i sy merli le flecu li ji'i pa lo remna birka .i le ve pluta be fo le flecu cu tcetce pluja .i ca lo nu le litki cu flecu kei le flecu cu muvdu .i ku'i le tarmi cu stodi .i sy mutce se cinri

ni'o ji'a le kumfa cu vasru vo serti .i lei vo serti cu kurfa gi'e fe'e ro roi lamji lo bitmu .i le kumfa cu vasru re bargu po'o .i se ki'u bo vy ga'u mo'i cadzu le serti .i bu'u le kojna le lamji serti cu salpo lo milxe cnita .i ku'i lo makfa cu rinka lo nu le girzu cu ga'u mo'i cadzu le lamji serti .i sy zgana lo du'u da cadzu ro le vi serti gi'e ku'i ro roi ga'u mo'i cadzu .i sy peisku lu .i ja mi'o pu kakne lo nu cadzu fa'a lo fatne .i se ki'u bo ro roi ni'a mo'i cadzu .i .oi li'u .i ba zi bo vy nergau le bargu