ni'o ca lo nu py .e sy xruti le sanmi kumfa vau la .reitcel. zutse ne'a le to'e plana ninmu noi ca co'u citka du'e tansi titnanba .i ry vitke cpedu muvgau lo xance fa'a le re mei .i ca lo nu tolcliva vau ry cusku lu ko vitke zutse .i doi sy ti se cmene zo .kim. li'u .i sy zutse to ca ku sy ganse lo ka milxe cortu be lo trixe gi'e ku'i to'e jursa .i se ki'u bo sy na frati toi gi'e cusku lu mi gleki lo nu penmi doi xagji zo'o li'u ju'e lu .u'i ro blupinxe cu mutce xagji .i je'u sai la .reitcel. pu zi cpedu pa re grasu jukpa sovda .e lo ni dasri xajre'u poi banzu lo nu zbasu pa culno xarju li'u ju'e lu .y. xu ry skicu lo se cpedu be fo lo simsa li'u ju'e lu .u'i sai go'i .i ry pu cusku lu da li'o .e pa xarju be te tai lo dasri xajre'u li'u .i se ki'u bo ro ti poi na du ry cu cmila .i ku'i lo drata cu cusku lu ma zdile li'u

ni'o sy viska lo tcetce tordu nanmu poi klama le jubme .i sy krici lo du'u ti tordu bilma .i ba zi bo ti cinba ry noi cusku lu ti poi fenki cu cmila mi mu'i lo nu mi cpedu lo cidja poi banzu mi to ry se fanza viska lo drata toi ba'e .e do .o'o nai .i ko jai gau galfi fi lo banfi .a lo simsa li'u .i le tordu cu cusku lu do cidja cpedu se va'u mi .i .ui sai mi mutce xagji li'u .i se ki'u bo so'o ti ji'a cmila .i ca lo nu go'i vau ry na kakne lo nu cmila rivbi .i le tordu cu so'o roi cusku lu ma zdile li'u po'o

ni'o ry cusku lu doi sy ko rinsa ti noi se cmene zo .stefen. .i ra mafpre gi'e kalte .i ku'i mi na djuno lo tadji be lo nu sy ka'e kalte da se pi'o lo tordu tuple li'u .i la .susan. cu to'e clite se spaji .i ku'i la .stefen. cu prami cisma gi'e cusku lu .i mi na djuno lo tadji be lo nu do na ru'i stedu darxi lo vorme bargu .i ta'o nai coi .susan. mi gleki lo nu penmi do .i za'a re diklo cmima cu se cmene srana zo sy .i mi ro roi nelci lo ropno sance favytcini be le cmene be mi be'o no'u zo .ctefan. .i se ki'u bo mi stidi zo cy to'i ro drata cu tugni toi .i ji'a zo dy po'o jai javni .i la .djen. fa'u la .deivid. fa'u la .dalton. fa'u la .rut. .an. se tcita zo dy fa'u zo vy fa'u zo gy fa'u lu ry .a bu li'u li'u .i sy cusku lu xu la dj .y. si si dy cu cmima ze'a da poi zmadu .y. vy .e gy li'u .i la .kim. cusku lu .i je go'i .i je da zmadu lo cmima ni temci be ro diklo cmima li'u

ni'o lo barda sanmi po cy .e ry cu bu'u se dunda dy noi cusku lu .u'i mi dunda lo mulno xarju do li'u gi'e selfu ke midju polgau .i lo nu dy noi mutce plana cu midju polgau cu spaji banli .i ro jibni cu cisma .i ji'a ry sanli gi'e skaci ke midju polgau se pi'o lo xanri skaci gi'e ckire cuksu fi dy

ni'o la .axmed. .e la .deivid. ba zi vitke le mintu jubme .i le re mei cu se xasne .i ky ciksi lo du'u ge dy .e .a bu cu nelci lo nu dabytadji rapcreze'a co'a cikna binxo gi lo drata cmima cu zo'o krici lo du'u le re mei cu menli bilma .i dy .e .a bu rinsa sy .i dy cusku lu .uo nai doi .susan. lo nu do cilre so'i da cu sarcu .i pa mai do nitcu lo nu jdice ma kau poi tadji be lo nu do ba xabju gi'e gunka .i ro lanzyki'i .e ro pendo be do cu se ckape co'a lo temci mokca be lo nu do pu nerkla le bu'u dinju .i lo nu da'i la'e di'u mukti do cu bilga lo nu do ca cliva .i ku'i mi kanpe lo nu do na se spaji .i sa'e nai re tadji cu zasti .i le pa moi tadji zo'u lo nu do drata gunka gi'e vitke lo se prami be do gi'e simsa zukte cu ranji .i ji'a do troci lo nu fadni tarti kei gi'e pacna lo nu lo bradi na facki fi do .e lo se prami .i le re moi tadji zo'u do ca ca'a sepli ro se prami .e lo jibri .e lo simsa gi'e xabju ti .i le pa moi cu xamgu la nicte cadzu lo ka sidju ge lo nu ma'a ca'o jundi lo fadni remna je fasnu gi lo nu do funca zgana tu'a lo bradi .i ku'iji'a le pa moi cu zmadu fi lo ka ckape lo se prami gi'e nandu .i .u'u ko jdice pu lo nu mi co'a ctuca do .i ku'i do zifre lo nu ze'u pensi .i ta'o lo na'e kalte cmima cu so'a roi kansa xabju .i ta'o ca ku da'a pa kalte cu kansa xabju .i mi sepli xabju li'u